Bronnadh Gradam an Phiarsaigh ar Liam Ó Cuinneagáin, cathaoirleach Údarás na Gaeltachta agus comhbhunaitheoir agus stiúrthóir Oideas Gael i nGleann Cholm Cille, Co Dhún na nGall.
Bronnann Fondúireacht an Phiarsaigh an gradam gach bliain ar dhuine a mheasann coiste neamhspleách mórchuid bheith déanta aige chun idéalacha an Phiarsaigh a chur chun cinn.
Ag ócáid speisialta i mBaile Átha Cliath an tseachtain seo a bhronnadh an gradam ar Liam agus chuir an tUachtarán Máire Mhic Giolla Íosa litir chomhghairdis chuige.
Chaith an tUachtarán roinnt samhraí ar chúrsa ag Oideas Gael feabhas a chur ar a cuid Gaeilge le cuidiú ó Liam.
Ag cur síos ar an ghradam, dúirt An tOllamh Brian MacCraith: “Ba thírghráthóir, nuálaí, fiontraí, ceannaire é an Piarsach, a labhair faoi ‘a regeneration of spirit’ nó ‘athghiniúint spioraid’ sa chóras oideachais.
“Anois agus dúshláin ar leith againn in Éirinn, is gá dúinn tógáil ar an oidhreacht agus an cheannródaíocht sin. Is é m’fhís do DCU ná Ollscoil Fiontraíochta a chothú bunaithe ar thírghrá pragmatach ina dtugaimid aghaidh ar riachtanais na sochaí agus comhobair ar ardchaighdeán lenár bpáirtnéirí i ngar agus i gcéin.
“Léiríonn Liam Ó Cuinneagáin, buaiteoir Ghradam an Phiarsaigh i mbliana, tríghrá, nuálaíocht, fiontraíocht agus ceannaireacht an Phiarsaigh, agus is onóir ar leith dom a bheith páirteach i mbronnadh na bliana seo.”
I measc na ndaoine ar bronnadh an Gradam orthu le blianta beaga anuas, tá an scoláire, file agus drámadóir, an tOllamh Seán Ó Tuama; An tArdeaspag Dónall Caird, Helen Ó Murchú, oideachasóir agus saineolaí teanga, Adi Roche, bunaitheoir Chernobyl Children’s Project agus diagaire, oideachasóir agus scríbhneoir Mons Breandán Ó Doibhlin.
Tá an Gradam á bhronnadh go bliantúil ó 1980 i leith.
Dúirt Liam Ó Cuinneagáin ag an ócáid: “Ní ró-mhinic a bhímse sa chomhluadar céanna nó ag teacht i gcomharbacht ar bheirt chomh huasal leis an Mons. Breandán Ó Doibhlin agus An tArdeaspag Dónall Caird – ní amháin a bheith i gcomhluadar na beirte réamhluaite ach fosta sonraithe le achan bhuaiteoir ó 1980 ar aghaidh.
“Fear ildánach a bhí sa bPiarsach a chuir an oiread sin aidhmeanna fiúntacha roimhe. Is eiseamláir é gur fiú do Ghaeil a leanúint. Is cinnte gur iontach an onóir dom é Gradam an Phiarsaigh a fháil agus tá mé thar a bheith bródúil as. Tá mé thar a bheith buíoch den choiste roghnaithe a d’fhéach chomh fada ó thuaidh agus Gleann Cholm Cille!”
Tags: